བརྒྱུད་འཛིན་གྱི་རྒྱལ་པོར་བསྟོད་པ་སེམས་ཀྱི་རང་མདངས།

༣ འབྲུག་ཡུལ་གྱི། །རྒྱལ་ཁབ་ནང་།  །ཆོས་ལྡན་གྱི། །རྒྱལ་པོ་བཞུགས། །

༤ བརྒྱུད་འཛིན་གསེར་ཁྲི། །ལྔ་པར་བྱོན་པའི། །མི་དབང་གེ་སར། །རྣམ་རྒྱལ་དབང་ཕྱུག །

༥ འབྲུག་པའི་མི་སེར་ཚུ། །ཁ་རྗེ་བཟངམོ་ལས་བརྟེན། །རྒྱལ་ཁབ་མཐའ་དབུས་མེདཔ། །ཞབས་ཀྱིས་བཅགས་ཏེ་གནང་། །

༦ འབྲུག་རྒྱལ་བཞི་པའི་ཐུགས་གཏེར། །རྒྱལ་ཡོངས་དགའ་སྐྱིད་དཔལ་འཛོམས། །
   འཛམ་གླིང་ཡོངས་ལུ་ཁྱབ་པའི། །མཛད་འཕྲིན་རྒྱས་པ་ལེགས་སོ། །

༧ འབྱུང་བ་བཞི་ཡི་རྐྱེན་ངན་གྱིས། །སྡུག་བསྔལ་མྱོང་པའི་མི་སེར་ཚུ། །
   སྔར་ལས་ལྷག་པའི་གཞིས་ཁྱིམ་དང་། །བཅས་པའི་སེམས་གསོ་གནང་བར་མཛད། །

མི་དབང་རྒྱལ་བཙུན་གཉིས་ལུ་བསྟོད་པ།

ཐབས་མཆོག་འཇིགས་མེད་རྒྱ་མཚོ་ཆེན་པོའི་ངོགས། །
ཆོས་སྲིད་ལུགས་གཉིས་གེ་སར་རྣམ་པར་རྒྱལ། །
ཙན་དན་ལྗོངས་སུ་འཁོར་ལོས་དབང་ཕྱུག་དུས། །
ཤེས་རབ་རིན་ཆེན་བརྙེས་པའི་དུས་བཟང་ཤར། །

སྔོན་སྨོན་འབུམ་གྱིས་བལྟམས་པའི་རྗེ་བཙུན་མ། །
པདྨའི་མདངས་ཀྱིས་ཡོངས་འཁྱུད་དབང་ཕྱུག་མ། །
ཁབ་ཏུ་བཞེས་པའི་རྟེན་འབྲེལ་ཕུན་ཚོགས་ལ། །
བློན་འབངས་བཀྲ་ཤིས་བདེ་ལེགས་གུས་བཏུད་ཞུ། །

གུས་རྩོམ་དེ་ རྒྱལ་བཙུན་ཁབ་ཏུ་བཞེས་པའི་རྟེན་འབྲེལ་ལུ་ དུང་རྩེ་སློབ་གྲྭ་ལས་ སྐུ་པར་ཕུལ་མི་ལུ་ བྲིས་ཡོདཔ་ཨིན།

ཞབས་ཁྲའི་ཚིག།

༡  ཕུན་ཚོགས་ཉམས་དགའ་སྐྱེད་ཚལ་ནང་། །མེ་ཏོག་མཛེས་པའི་ཟེའུ་འབྲུ་ལས། །
   འཛག་པའི་སྦྲང་རྩི་མངར་བའི་རོས། །བུང་བའི་གཤོག་སྒྲོ་རྒྱས་ཞིནམ་ལས། །
                   ཕྱོགས་བཞིར་འཕུར་བའི་ལྟད་མོ་ཆེ། །

ལྡུམ་ར་མེ་ཏོག་སེར་སྤྱང་གསུམ། །ཕུན་སུམ་ཚོགས་པའི་སྐྱིད་ཉམས་སྐྱོང་། ། ༢

༢ རྩ་ཆུ་འཛོམས་པ་སྤང་ཐང་ལུ། །སྙིང་རྗེ་ཅན་གྱི༌ཤཝ༌མོ༌ལས། །
   དཀར་བའི་འོ་མའི་བདུད་རྩི་གིས། །ཤ་ཕྲུག་ལུས་རྩལ་རྒྱས་པ་དེས། །
              སྤང་གཤོང་སྐོར་བའི་མཐོང་སྣང་མཚར། །

ཤ་བ་ཤ་ཕྲུག་སྤང་ཐང་གསུམ། །ལས་སྨོན་མཐུན་པའི་དགའ་ཉམས་བྱུང་། ། ༢

༣ མཐུན་རྐྱེན་ཚང་བའི་སློབ་གྲྭ་ནང་། །བྱམས་བརྩེ་ཆེ་བའི་སློབ་དཔོན་ལས། །
   སྙིང་གི་བདུད་རྩི་ཤེས་ཡོན་གྱིས། །ན་གཞོན་བློ་རིག་རྒྱས་ཞིན་ལས། །
               མི་ཚེ་སྐྱོང་བའི་སྤྲོ་ཉམས་ཆེ། །

སློབ་གྲྭ་སློབ་དཔོན་སློབ་ཕྲུག་གསུམ། །མཐུན་ལམ་ཡོད་པའི་གྲུབ་འབྲས་ཨིན། ། ༢


སྤྱི་ལོ་༢༠༡༡ ལོའི་ སློབ་དཔོན་གྱི་ཉིནམ་བརྩི་སྲུང་ཞུཝ་ད་ དུང་རྩེ་སློབ་གྲྭའི་ སློབ་ཕྲུག་ཚུ་ལུ་དམིགས་ཏེ་ སློབ་བསྟན་འཛིན་རྡོ་རྗེ་ ང་བཅས་གཉིས་ཀྱིས་ འཐེན་ཡོད་པའི་ཞབས་ཁྲ་ཨིན།

རྫོང་ཁ་འདི་ག་གིས་ལག་ལེན་འཐབ་སྨོ?

༉ སྤྱི་ལོ་༢༠༡༤ ལུ་ ང་གིས་སློབ་དཔོན་འབད་དེ་ ལོ་ངོ་དྲུག་འགོ་བཙུག་དོ་ཡོདཔ་དང་འབྲེལ་ ལོ་ལྔ་གི་ཉམས་མྱོང་དང་
འཁྲིལ་གློག་རིག་ཟེར་མི་འདི་ དུས་ཀྱི་འགྱུར་བ་དང་བསྟུན་ ཤེས་ཡོན་སྤེལ་ཐབས་དྲག་ཤོས་ཅིག་འབད་ ངོས་ལེན་འབདཝ་ཨིན། ད་ཚུན་གློག་རིག་གི་ཐོག་ལས་ རང་གི་ཉམས་མྱོང་དང་ཚོར་བ་བརྗེ་སོར་འབད་ས་བལྟ་སྟེ་ དེ་བཟུམ་གྱི་ཅ་ཆས་བཟོ་བསྐྲུན་འབད་མི་ཚུ་ལུ་ངལ་རངས་དང་ཡིད་ཆེས་ཡང་ལྷག་པར་བསྐྱེད་དེ་ཡོད།

དུས་ཅི་སྤྱི་ཟླ་༥པའི་ནང་ ངེ་གི་ཆ་རོགས་ ཨོ་རྒྱན་རྡོ་རྗེ་ལས་གྲོགས་རམ་ལེན་ཐོག་ ཡོངས་འབྲེལ་གཅིག་གསར་བཟོ་འབད་ཞིནམ་ལས་ དེ་ནང་ལུ་རང་གི་བསམ་འཆར་དག་པ་ཅིག་བཀོད་དེ་ ཟླཝ་ཕྱེད་དང་གསུམ་དེ་ཅིག་སོང་རུང་ དོན་ཡོད་ཀྱི་བསམ་འཆར་བཀོད་ནི་ཕར་བཞག་ ཐ་ན་ཡིག་རིགས་ཚུ་ལུ་དགའ་ཚོར་གྱི་ངོས་ལེན་འབད་མི་ ཕུད་དོ་གཅིག་ཡང་མ་འཐོན་མི་ལུ་བལྟ་བ་ཅིན་
འབྲུག་རྒྱལ་ཁབ་ཀྱི་ རྒྱལ་ཡོངས་སྐད་ཡིག་གི་གནས་ཚད་དེ་དང་ དེ་ལུ་ངོས་ལེན་ཡོད་མེད་ཀྱི་གྲུབ་འབྲས་ངོ་མ་གསལ་སྟོན་
འབདཝ་ཨིན་པས།

ལོ་ཕྱེད་ངལ་གསོ།

༉ ཚེ་སྔོན༌ལས་ཀྱིས་འབྲེལ་བའི་ཆ་རོགས་དང་། །སྨོན་ལམ་གཅིག་ཁར་བཏབ་པའི་ན་གཞོན་ཚུ། །
 ཞག་པོ་བཅོ་ལྔའི་ངལ་གསོ་རྫོགས་ཞིནམ་ལས། །ལོག་སྟེ་སློབ་གྲྭར་བྱོན་པ་ལེགས་སོ་ཞུ། །

དུས་ཡུན་ཉིན་ཞག་བཅོ་ལྔ་ཟེར་མི་འདི། །དབང་འདུས་ལུང་པའི་རླུང་ཤུགས་དེ་དང་མཉམ། །
སྡོད་ལོང་མེད་པར་འགྱོ་རུང་དུས་ཚོད་དེ། །དོན་དག་ཡོད་པའི་ལཱ་གིས་རྫོགས་ཡོད་ཞུ། །

སློབ་རིམ་བརྒྱད་པའི་སློབ་ཕྲུག་བརྒྱ་དང་བརྒྱད། །སློབ་རིམ་བཅུ་གཅིག་ལྔ་བཅུ་ལྔ་གཅིག་གི། །
ལན་ཤོག་དབྱེ་ཞིབ་རྐྱབ་པའི་དུས་ཚོད་ལུ། །རང་གི་འགན་ཁུར་བརྟག་དཔྱད་འབད་དགོཔ་འཐོན། །


སྤྱིར་གྱིས་ཚེ་སྔོན་བསོད་ནམས་ཆེ་ཆུང་དང་། །ཚེ་འདིར་བརྩོན་འགྲུས་ཆེ་ཆུང་ཁྱད་པར་ལས།།
གྲུབ༌འབྲས༌མི༌འདྲ༌སོ༌སོ༌འཐོན༌དགོཔ༌དེ། །མི་འདོད་ཁས་ལེན་འབད་དགོཔ་ཆོས་ཅིག་ཨིན། །

ཨིན་རུང་ཟླ་གྲངས་བཞི་ལྔ་ཅིག་གི་རིང་། །རང་གིས་གང་ཤེས་བློས་ཕོག་ཡིད་ཕོག་འབད། །
སློབ་སྟོན་འབད་མི་འདི་དང་གྲུབ་འབྲས་གཉིས། །ག་བསྡུར་འབད་ཚེ་ཨ་ཙི་བློ་མ་བདེ། །

གྲུབ་འབྲས་རང་གི་རེ་བ་བསྐྱེད་དོ་བཟུམ། །བྱུང་ནིའི་དོན་ལུ་ག་ཅི་འབད་དགོ་ག །
ཞིབ་འཚོལ་འབད་ཚེ་ཐད་ཀར་ལན་མེད་པའི། །དྲི་བ་མི་འདྲ་སྣ་ཚོགས་སེམས་ལུ་ཤར། །

ཆ་རོགས་ཚུ་དང་ན་གཞོན་གཞན་ཚུ་གིས། །དྲིས་ལན་ཡོད་ན་གློག་ལམ་དེ་བརྒྱུད་དེ། །
ཁུངས་བཤད་བྱས་ནས་དུས་ཡུན་མ་རིང་པར། །བསླབ་བྱ་བཅསཔ་སྦེ་གནང་བའི་རེ་སྨོན་ཞུ། །

འབྲུག་གི་སློབ་ཕྲུག་ཤེས་ཡོན་མཆོག་གྱུར་ལུ། །བཟོ་དགོཔ་ཡོད་ན་ཤེས་རིག་ལམ་ལུགས་ལུ། །
བསྒྱུར་བཅོས་འབད་དགོཔ་འདུག་ག?སློབ་དཔོན་གྱི། །ཕྱག་ལཱ་གནང་སྟངས་བཅོས་ཁ་བརྐྱབ་ནི་སྨོ། །

ན་གཞོན་ཨ་ལོའི་བརྩོན་ཤུགས་ཉུང་སོངམ་སྨོ། །ཕམ་གིས་རྒྱབ་སྐྱོར་རྩ་ལས་མ་བྱིནམ་སྨོ། །
དུས་དང་མ་བསྟུན་ལཱ་འགན་མང་སོངམ་སྨོ། །དེ་ལུ་དབྱེ་ཞིབ་མཐིལ་ཕྱིན་འབད་ཞིནམ་ལས། །

རྒྱབ་སྐྱོར་འབད་མི་འདུག་ག་མནོ་བསམ་བཏང་། །དོན་དག་མེད་པའི་དྲི་བ་ཁ་ཤས་ཅིག །
མ་ཆགས་སེམས་ཀྱི་རི་མོ་ཕྱི་ལུ་ཤར། །འཛོལ་བ་ཡོད་ན་མཁས་པས་བཟོད་པ་བཞེས། །

སྲིད་བློན་ནཱ་རེན་དརཱ་མོ་ཌི་གིས་ཨིང་སྐད་མ་ཤེསཔ་ཨིན་ན?

སྲིད་བློན་ནཱ་རེན་དརཱ་མོ་ཌི་གིས་ཨིང་སྐད་མ་ཤེསཔ་ཨིན་ན?

༉ རྒྱ་གར་རྒྱལ་ཁབ་ཀྱི་སྲིད་བློན་བཅོ་ལྔ་པ་གིས་ སྲིད་བློན་གྱི་གོ་གནས་ཐོབ་པའི་ཤུལ་ལུ་ ཕྱི་རྒྱལ་གྱི་བལྟ་སྐོར་ལས་ དང་པ་ར་འབྲུག་རྒྱལ་ཁབ་ནང་འབྱོན་ནི་འབད་ ཐག་བཅད་གནང་བའི་ལོ་རྒྱུས་ གོཝ་ད་ སྤྱིར་འཛམ་གླིང་གི་མི་མང་གིས་ མགྲིན་གཅིག་དབྱངས་གཅིག་གི་ཐོག་ལས་ ག་ཅི་འབད་ཕྱི་རྒྱལ་བལྟ་སྐོར་ལས་ དང་པ་འབྲུག་ལུ་གདམ་ཁ་བརྐྱབས་དགོཔ་སྨོ? ཟེར་བའི་དྲི་བ་བཀོད་པའི་སྐབས་ ངེ་གི་སེམས་ལུ་ དྲི་བ་སོ་སོ་ཅིག་ཤར་འོང་ཡི།

   ཨིན་རུང་དེ་ལུ་མནོ་བསམ་ ཤུགས་ཅིག་མ་གཏང་པར་ རྒྱ་གར་སྲིད་བློན་གྱི་གཟིགས་སྐོར་གྱི་ལས་རིམ་དེ་ ག་ཅི་བཟུམ་ཅིག་འབད་ མཐར་འཁྱོལ་བྱུང་འོང་ག་ཟེར་སྒུག་སྡོད་ཅི། དབུ་འཕངས་མཐོ་བའི་འབྲུག་གི་སྤྱི་ཚོགས་ནང་ རྒྱ་གར་གྱི་སྲིད་བློན་གྱིས་ 

གསུང་བཤད་གནང་པའི་ལས་རིམ་འདི་ བལྟ་ནི་འགོ་བཙུགཔ་ད་གཅིག་ཁར་ ཧེ་མ་ལས་སེམས་ལུ་ཤར་ཡོད་པའི་དྲི་བ་ སྲིད་བློན་ནཱ་རེན་དརཱ་མོ་ཌི་གིས་ཨིང་སྐད་མ་ཤེསཔ་ཨིན་ན? ཟེར་མི་འདི་གི་ལན་འཚོལ་ནི་འགོ་བཙུགས་ཅི།

  ང་བཅས་ར་འབྲུག་རྒྱལ་ཁབ་ལུ་ཆ་བཞག་པ་ཅིན་ དབང་ཚད་དང་གོ་གནས་ཀྱི་མཐོ་དམན་མེད་ ཤེས་ཡོན་ཡོད་མེད་ཀྱི་ཁྱད་པ་མེད་པར་ ཨིང་སྐད་ཀྱི་ཚིག་གཅིག་ལག་ལེན་འཐབ་ནི་ཡོད་པ་ཅིན་ མི་གི་སྦུག་ལུ་བཟང་ལམ་ལམ་དང་ དེ་ལག་ལེན་འཐབ་མ་ཚུགས་པ་ཅིན་ མི་དེ་འཇོན་སྟངས་རྩ་ལས་མེདཔ་འབད་བརྩི་བའི་ དུས་སྐབས་གཅིག་ཨིནམ་མ་ཚད་ རང་གི་རྒྱལ་ཡོངས་ཁ་སྐད་

ལག་ལེན་འཐབ་མི་དང་ དེ་ཡར་རྒྱས་གཏང་ནི་ལུ་བརྩོན་ཤུགས་བསྐྱེད་མི་ཚུ་ལུ་ སྣང་ཆུང་འབད་རྩིས་བཞག་དོ་ཡོདཔ་ ཁུངས་བཀལ་མི་དགོ་པར་ མིག་གིས་མངོན་སུམ་མཐོང་སར་ཨིན། 

  གོ་གནས་ལས་འབདན་ འཛམ་གླིང་གི་མི་འབོར་མང་ཤོས་ཀྱི་རྒྱལ་ཁབ་གཅིག་གི་སྲིད་བློན་དང་ ཡོན་ཏན་ལས་དཔྱདན་ འཛམ་གླིང་ནང་ཡོང་གྲགས་ཅན་གྱི་རྩོམ་བྲིསཔ་ཅིག་གིས་ རང་གི་རྒྱལ་ཁབ་ནང་ལོས་ གཞན་རྒྱལ་ཁབ་ཀྱི་སྤྱི་ཚོགས་ལྷན་ཞུགས་ནང་ རང་གི་ཁ་སྐད་ནང་ གསུང་བཤད་གནང་ས་བལྟ་བ་ཅིན་ རང་གི་ཁ་སྐད་བདག་འཛིན་འབད་ནི་དེ་ག་དེ་ཅིག་གལ་ཆེཝ་ཨིན་ན? སྲིད་བློན་མཆོག་གིས་ འབྲུག་རྒྱལ་ཁབ་ཀྱི་དབུ་འཁྲིདཔ་ཚུ་ལུ་ རང་གི་རྒྱལ་ཡོངས་ཁ་སྐད་བདག་འཛིན་འབད་དགོ་པའི་ སྐུལ་མ་གནང་མི་ལུ་ གོ་གནས་དང་ཡོན་ཏན་མེད་རུང་ རང་གི་ཁ་སྐད་ལུ་བརྩི་བཀུར་དང་གུས་ཞབས་ཚད་མེད་ཡོད་མི་ ཉམས་ཆུང་རང་གིས་ ལག་པའི་མེ་ཏོག་སྙིང་ཁར་སྦྱར་ཏེ་ བཀའ་དྲིན་དགའ་ཚོར་ཞུ་ནི་ཨིན། 

  སྤྱིར་བཏང་འབྲུག་རྒྱལ་ཁབ་ཀྱི་དྲིན་ཅན་གྱི་ཕམ་ འཛམ་གླིང་གི་དབུ་འཁྲིདཔ་ག་ར་གིས་ བསྟོད་པ་རྐྱབ་ས་ མི་དབང་འབྲུག་རྒྱལ་བཞི་པ་མཆོག་གིས་ ཞལ་འཛོམས་ལ་སོགས་པ་ཚོགས་པའི་སྐབས་ ཕྱི་རྒྱལ་གྱི་མི་རིགས་ཡོད་རུང་ གསུང་གྲོས་དེ་རྒྱལ་ཡོངས་ཁ་སྐད་ནང་གནང་ཞིནམ་ལས་ སྐད་བསྒྱུར་རྐྱབ་དགོ་པའི་ ཞལ་བཀོད་གནང་པ་གིས་མ་ཚད་ བྱིན་ཅན་གྱི་བཀའ་ཐམ་གནང་ཡོད་རུང་ དེ་ལུ་ང་བཅས་འབྲུག་པའི་དབུ་འཁྲིདཔ་ཚུ་གིས་ བརྩི་བཀུར་ག་དེམ་ཅིག་མཛད་དེ་ཕྱག་ལཱ་གནང་དོ་ག? འགན་འཁྲི་དང་འགན་ཁུར་བསྣམ་མི་རང་རང་སོ་སོའི་ཐུགས་ལས་གསལཝ་མེད།

  

  རྒྱལ་ཁབ་ག་ཨིན་རུང་ དེ་རང་དབང་རང་བཙན་ཡོད་མེད་དེ་ མི་རློབས་མང་ཉུང་ སྟོབས་ཤུགས་ཆེ་ཆུང་ མཐུན་ལམ་ཆེ་ཆུང་ལ་སོགས་པ་གིས་ བལྟཝ་མེན་པར་ རྒྱལ་ཁབ་གཞན་དང་ཐུན་མོང་མིན་པའི་ ཁ་སྐད་ཡོད་མེད་ལུ་བལྟ་དགོཔ་ཨིན། རྒྱལ་ཁབ་གཅིག་གིས་གཅིག་དབང་བཙོང་འབད་རུང་ དམིགས་ཡུལ་ངོ་མ་ ཁ་སྐད་རྩ་མེད་གཏང་ནི་ལུ་ གཞི་བཟུང་མི་ཡང་རྒྱུ་མཚན་དེ་ལས་ཨིནམ་ལས་  ང་བཅས་འབྲུག་རྒྱལ་ཁབ་འདི་ འཛམ་གླིང་རྒྱལ་ཁབ་གཞན་གྱིས་ རང་ལུགས་ལམ་སྲོལ་གྱིས༌ཕྱུག་ཤོས་འབད་ ངོས་འཛིན་འབད་བའི་ དགའ་ཚོར་ལུ་ རང་གི་ཁ་སྐད་འདི་ རང་གིས་རྩ་མེད་གཏང་ནིའི་རྩིས་མ་བརྐྱབ་པ་ཅིན་མི་དྲག་ག?

  རྒྱ་གར་གྱི་སྲིད་བློན་མཆོག་ལུ་ དཔེ་བལྟ་ཞིནམ་ལས་ ཐུགས་རིག་རྣམ་པར་བཀྲ་བའི་ དཔལ་ལྡན་འབྲུག་པའི་སྤྱི་ཚོགས་ཀྱི་འཐུས་མི་གིས་ དབུ་གཙོས་པའི་ འབྲུག་མི་རེ་རེ་བཞིན་གྱིས་ རང་གི་ཁ་སྐད་དེ་རྩ་ཆེན་དང་ སྙིང་ནོར་འབད་རྩིས་ཞིནམ་ལས་ ཡར་བཏང་པའི་རེ་བ་དང་སྨོན་ལམ་ཡང་ལས་ཡང་དུ་ཞུཝ་ཨིན་ནོ།།

རྒས་ནི་མེད་པའི་བརྩེ་གདུང་།

རྒས་ནི་མེད་པའི་བརྩེ་གདུང་།

༉ དྲན་ཐེང་གཅིག་གི་དབུགས་རིང་ནང་ཤར་བའི་ ལོ་ངོ་དྲུག་གི་ལོ་རྒྱུས་ཀྱི་གཟུགས་བརྙན་ཚུ་ བལྟ་འདོད་པའི་ གློག་གྲོགས་ཚུ་ལུ་ མཐོང་སྣང་རེ་རེ་བཞིན་དུ་སྤྱན་འབུལ་ཞུ་ནི་ཨིན། ཚེ་སྔོན་གྱི་ལས་ཟེར་རུང་ ཚེ་ད་ལྟོའི་བཟའ་སྐལ་ཟེར་རུང་འདྲ་ ང་ཆུང་ཀུ་ཅིག་འབད་སྡོད་པའི་བསྒང་ལས་ སྤྲོ་བ་ཡོད་པའི་ལཱ་འགན་འདི་ རང་ལོ་༢༤ལུ་རྐྱངམ་ཅིག་ལུ་འབད་ནིའི་གོ་སྐབས་ཐོབ་ཅི། སྤྱིར་གྲྭ་

ཚང་གི་རིགས་ལས་ཕར་ སློབ་སྟོན་པའི་འགན་ཁུར་འབག་མི་དང་ སློབ་གྲྭ་ནང་ལས་ཕར་སློབ་དཔོན་གྱི་འགན་ཁུར་འབག་མི་གཉིས་ལུ་ ཁྱད་པ་ཡང་སྦོམ་ར་འདུག།

  སློབ་དཔོན་ཟེར་བའི་མིང་འདི་ བྱིན་རླབས་ཅན་ཅིག་དང་ འགན་ཁུར་ཅན་ཅིག་ཨིནམ་ མི་གཞན་གྱིས་ངོས་ལེན་མ་འབད་རུང་ ང་དང་ང་འདྲ་བའི་སློབ་དཔོན་གྱི་མིང་འབག་མི་ཚུ་ལུ་ ཉམས་མྱོང་གི་ཐོག་ལས་ ཡིད་ཆེས་མ་འབད་ཐབས་མེད་ཅིག་ཨིན་པས། དུས་ཚོད་ངན་པ་ཟེར་ དུས་ལུ་ཁ་བཏང་རུང་འདྲ་ མི་ངན་པ་ཟེར་ མི་ལུ་ཁ་གཏང་རུང་འདྲ་ ད་རེ་ནངས་པ་སློབ་དཔོན་གྱི་འགན་ཁུར་འབག་ནི་འདི་ གནམ་མེད་ས་མེད་ལ་ཁག་གི་གནས་སྟངས་ཅིག་ནང་ལྷོད་ཡོདཔ་ཨིན།

  ཨིན་རུང་ སློབ་དཔོན་གྱི་སེམས་ཀྱི་ནང་ན་ཡོད་པའི་ བྱམས་བརྩེ་ལུ་རྒས་ནི་རྩ་ལས་མིན་འདུག་ཟེར་མི་འདི་ མཁས་པ་སྟོང་གི་

རྒོལ་བ་འོང་རུང་ ང་གིས་ཁས་བླངས་འབད་ནི་ལུ་ཐེ་ཚོམ་མེདཔ་ཡར་སོང་ཡི། ད་རེ་ཚུན་ཚོད་ང་གིས་ སློབ་ཕྲུག་སྟོང་ཕྲག་ལས་
ལྷགཔ་དང་ སློབ་དཔོན་བརྒྱ་ཕྲག་ལས་བཅད་ འབྲེལ་བ་འཐབ་བསྟཝ་ད་ སློབ་དཔོན་གྱིས་དུས་ནམ་ཅིག་ཡང་ སློབ་ཕྲུག་མེདཔ་གཏང་ནིའི་མནོ་བསམ་རྩ་ལས་མ་བཏངམ་ཨིནམ་ མཁས་པ་འབུམ་གྱིས་ཞིབ་འཚོལ་འབད་རུང་ གྲུབ་འབྲས་དེ་སྦེ་ར་མ་འཐོན་དཀའ་མེད་ཨིན།

  ངེའི་ཉི་ནུབ་མེད་པའི་སྨོན་ལམ་དང་ བསམ་པའི་རེ་བ་འདི་ སློབ་དཔོན་ཚུ་གི་རྒྱུད་ལུ་ཡོད་མི་བརྩེ་གདུང་གི་ཆུ་མིག་དེ་ དུས་ནམ་ཅིག་ཡང་མ་བསྐམ་པར་ ན་གཞོན་ཚུ་གི་མི་ཚེ་གི་རེ་འདོད་གྲུབ་སྟེ་ མི་ཚེ་མཐར་འཁྱོལ་ཅན་ཅིག་ལུ་འགྱོ་བཅུག་ཟེར་ཞུ་ནི་ཨིན།

ལོ་ངོ་ ༣༡ གི་དྲན་ཚོར།

༉ རང་ལུགས་གནམ་ལོ་ཆུ་མོ་ཕག་ལོ་ སྤྱི་ལོ་༡༩༨༣ ལོ་ལུ་ ཚེ་ཧེ་མ་གི་ལས་དང་སྨོན་ལམ་ལས་བརྟེན་ ས་ཕྱོགས་ཉམས་དགའ་བའི་ གནས་ཆེན་སྒང་སྟེང་དགོན་པའི་ཉེ་འདབ་ལུ་ བཀའ་དྲིན་ཆེ་བའི་ཨ་པ་ པ་སངས་དང་ བྱམས་བརྩེ་ཅན་གྱི་ཨའི་ ཀུམ་བུ་སྒྲོལམ་གཉིས་ཀྱིས་ ཨ་ལོ་བཅུ་གཉིས་སྐྱེ་བའི་བཅུ་གཅིག་པ་བུ་གསུམ་དང་བུམོ་གསུམ་ལུས་པའི་ བུ་གསུམ་གྱི་བར་མ་སྐོརམ་འབད་སྐྱེ་བའི་གོ་སྐབས་ཐོབ་སྟེ་ཡོད།

  སྐྱེས་ཞིནམ་ལས་ ལོ་ལྔ་ཚུན་ཚོད་ བཀའ་དྲིན་ཆེ་བའི་ཡབ་ཡུམ་གཉིས་དང་ བརྩེ་གདུང་ཆེ་བའི་ སྤུན་ཆ་སྦོམ་ཤོསཚུ་གི་བྱམས་སྐྱོང་གི་འོག་ལུ་ ལུས་སེམས་གཉིས་ལུ་དཀའ་ངལ་མེད་པར་ ཨ་ལོའི་མི་ཚེ་འདི་དགའ་སྤྲོ་གི་ཐོག་ལས་སྐྱོང་ཡོད་པའི་དྲན་ཚོར་ཨ་ཙི་རེ་བྱུང༌མས།
  དེ༌ལས༌ སྤྱི༌ལོ༌༡༩༨༦ལུ༌  ཚེ༌སྔོན༌བསོད༌ནམས༌བསགས༌པའི༌འབྲས༌བུ༌དང་ ཕམ༌སྤུན༌ཆ༌ཚུ༌གིས་རེ༌འདོད༌ སྦོམ་བསྐྱེད་དེ་ འབྲུག་དབང་འདུས་ཁམས་གསུམ་ཆོས་ཀྱི་ཕོ་བྲང་ནང་ རབ་སྡེའི་གྱལ་གྱི་མཐའ་མར་འཛུལ་ནིའི་ གོ་སྐབས་སྦོམ་ཐོབ་མི་འདི་ ངལ་རང་གི་གཞི་སྦོམ་ཅིག་ཨིན། ལོ་གཉིས་མ་ལངམ་ཅིག་གི་རིང་ དབང་འདུས་རྫོང་ནང་སྡོད་པའི་སྐབས་ གནས་སྟངས་ག་ཅི་བཟུམ་སྦེ་སྡོད་ཡི་ག་ དྲན་མ་ཚུགས་རུང་ མི་ཚེ་ལས་ཉམས་དགའ་ཤོས་ ཨ་ལོའི་དུས་ཚོད་འདི་ སྒྲིག་གཞི་ག་ནི་ལས་དམ་པའི་ སྤྱི་ཚོགས་ཅིག་ནང་རྫོགས་ཡོད་པའི་ཚོད་ཅིག་འདུག།

  སྤྱི་ལོ་༡༩༨༨ལས་ ༡༩༩༩ཚུན་ཚོད་ཁྱུང་གནས་དགོན་པ་དང་ རིན་ཆེན་གླིང་བཤད་གྲྭ་ནང་ ལྟོ་གོས་ཆོས་གསུམ་གྱི་བཀའ་དྲིན་བླ་ན་མེད་པའི་ རྩ་བའི་བླ་མ་ སྐྱབས་རྗེ་ཡེ་ཤེས་རིན་ཆེན་༼ལས་ཚོགས་སློབ་དཔོན་འཆི་མེད་རིན་པོ་ཆེ་༽ མཆོག་ལས་རིག་གནས་དང་ མདོ་སྔགས་ཀྱི་ཆོས་ཞུ་ནིའི་གོ་སྐབས་ཐོབ་ཅི།

སྤྱི་ལོ་༢༠༠༠ལུ་སི་ཀིམ་དང་རྟ་མགོ་སྡོད་ཡི།

༢༠༠༡ལས་༢༠༠༥ཚུན་མེ་སོར་སྔ་འགྱུར་མཐོ་སློབ་མདོ་སྔགས་རིག་པའི་འབྱུང་གནས་གླིང་ལུ་སྡོད་ཡི།

༢༠༠༦ལུ་རྟ་མགོ་ཆེས་མཐོའི་བཤད་གྲྭ་ནང་སྡོད་ཡི།

༢༠༠༧ལུ་ ན་ལེནྡ་བཤད་གྲྭ་ནང་སྐྱོར་དཔོན་གྱི་ལས་འགན་འབག་ཡོད།

༢༠༠༨ལུ་སྤ་རོ་ཤེས་རིག་མཐོ་རིམ་སློབ་གྲྭ་ནང་ སློབ་དཔོན་སློབ་སྦྱོང་འབད་ཡི།

༢༠༠༩ལས་༢༠༡༢ ཀྱི་ལོ་ཕྱེད་ཚུན་ དུང་རྩེ་འབྲིང་རིམ་སློབ་གྲྭ་ནང་སློབ་དཔོན་འབད་ཕྱག་ཞུ་ཡི།

༢༠༡༢ ལོ་ཕྱེད་ཀ་ བཀྲ་ཤིས་རྩེ་སློབ་གྲྭ་ཆེ་བ་ནང་ སློབ་དཔོན་འབད་སྡོད་ཡི།

༢༠༡༣ལས་ བར་གྱོང་སློབ་གྲྭ་ནང་སློབ་དཔོན་འབད་ཕྱག་ཞུ་དོ།